It-Tmienja ta' Settembru hija ġurnata speċjali ħafna għalina. Din is-sena għalaqna Tmien snin!
Meta tgħidha, malajr tidher qisha sempliċement numru.
Imma meta nħares lura, tmien snin ifissru mijiet ta’ laqgħat, attivitajiet, diskussjonijiet, talb, daħk, sfidi, ħbiberiji, memorji… u ovvjament, ħafna ikliet flimkien ukoll! 😄
Imma fuq kollox, tmien snin għalijja jfissru diversi persuni li ltqajna magħhom.
Għax The Call Ministries qatt ma kienet maħsuba biex tkun sempliċement laqgħat, organizzazzjoni, jew grupp ieħor fejn wieħed jiġi sempliċiment għall-laqgħa u mbagħad imur lura d-dar.
Sa mill-bidu nett, dil-ħolma u din is-sejjħa kienet ħafna aktar.
Li nibnu familja... Li nibnu komunita'... Li noħolqu spazju fejn persuna tiġi u tħoss li magħna, għalijha hemm post!
Post fejn wieħed jista’ jsib il-ħbiberija.
Post fejn wieħed jista’ jikber fil-fidi.
Post fejn min iħossu waħdu jiskopri li m’għandux għalfejn jibqa waħdu.
Post fejn min ikun qed ifittex direzzjoni, valuri u skop f’ħajtu jista’ jibda jiskoprihom flimkien ma’ oħrajn.
U meta llum inħares madwari, ninduna li dik il-ħolma u dik is-sejjħa, bil-mod il-mod, bdiet issir realtà.
Ma lħaqniex il-perfezzjoni u mhux dejjem kollox mar kif xtaqna.
Kellna mumenti diffiċli u kellna ukoll id-diżappunti.
Kellna attivitajiet li marru tajjeb ħafna… u oħrajn ftit anqas :) .
Kien hemm nies li mxew magħna għal parti mill-vjaġġ u mbagħad komplew bi triqthom.
Kien hemm bidliet.
U kien hemm ukoll mumenti meta forsi staqsejna: “Fejn sejrin b’dan kollu?”
Imma matul dan kollu, ħaġa waħda baqgħet kostanti.
Alla baqa’ miexi magħna.
U forsi din hija waħda mill-akbar lezzjonijiet ta’ dawn it-tmien snin.
Alla ħafna drabi ma juriniex it-triq kollha f’daqqa.
Jagħtina biżżejjed dawl biex nagħmlu l-pass li jmiss.
Aħna kultant irridu nkunu nafu kollox.
X’se jiġri s-sena d-dieħla?
Dan se jirnexxi?
Se jiġu n-nies?
Il-grupp se jikber?
Se jkollna min jgħinna?
Qed nieħdu d-deċiżjonijiet it-tajba?
U moħħna malajr jimtela bil-ħafna: “U jekk…?”
Imma l-fidi tgħallimna nistaqsu mistoqsija oħra: “Alla x’qiegħed jitlob minna llum?”
Tmien snin ilu għamilna pass... Imbagħad ieħor... U ieħor.
U dawk il-passi żgħar wassluna s’hawn.
The Call Ministries ma teżistix minħabba persuna waħda.
Teżisti għax kien hemm nies li ddeċidew li jkunu parti minnha.
Nies li ġew għal-laqgħat.
Nies li għenu fl-attivitajiet.
Nies li taw lifts bil-karozza.
Nies li ħejjew il-post.
Nies li laqgħu lil min kien ġdid.
Nies li baqgħu wara biex inaddfu.
Nies li bagħtu messaġġ meta ndunaw li xi ħadd ma kienx sejjer tajjeb.
Nies li talbu għal xulxin.
U nies li sempliċement qagħdu ħdejn persuna li kellha bżonn il-kumpanija.
U forsi wħud mill-isbaħ affarijiet li seħħew f’dawn it-tmien snin qatt ma dehru fuq Facebook jew Instagram... Seħħew fis-skiet.
Konversazzjonijiet... Ħbiberija... Xi ħadd li ġie inkluż... Xi ħadd li ġie mismugħ.
Xi ħadd li skopra: “Forsi jien ukoll għandi post.”
Dawn il-mumenti huma wkoll parti mill-ħidma u l-missjoni tagħna.
Forsi huma l-aktar parti importanti.
Għax Ġesù bena l-ministeru tiegħu madwar in-nies.
Kien jara lin-nies... Kien jismagħhom... Kien joqgħod magħhom u jimxi magħhom.
U kontinwament jurihom li: “Kull persuna hi mportanti għal Alla.”
U din trid tibqa’ l-qalba ta’ The Call Ministries.
U Issa… Xi Ngħidu għas-Snin Li Ġejjin?
Fl-Anniversarju niċċelebraw il-passat... Imma ma nistgħux ngħixu fil-passat.
Il-mistoqsija m'hijiex biss: “X’għamilna s’issa?”
Il-mistoqsija aktar importanti hija: “Alla x’qiegħed isejħilna biex insiru?”
Għax l-isem tagħna stess ifakkarna f’dan: The Call – Is-Sejħa.
Dejjem hemm sejħa.
Sejħa biex nikbru... Sejħa biex naqdu... Sejħa biex nilqgħu... Sejħa biex ninbidlu... Sejħa biex nilħqu lil xi ħadd li għadu ma skopriex li hawn post għalih.
Fis-snin li ġejjin nixtieq li nsiru komunità saħansitra aktar b’saħħitha, fejn in-nies jistgħu verament jesperjenzaw: Fidi... Ħbiberija...u Familja.
Nixtieq li nsiru aktar sensittivi biex ninnutaw lil min ikun waħdu.
Nixtieq li nkomplu ntejjbu il-mod ta' kif nilqgħu lil min jiġi għall-ewwel darba.
Nixtieq li nagħtu aktar responsabbiltà u opportunitajiet lill-min irid jimpenja ruħu fil-missjoni tagħna.
Nixtieq li lkoll ninfetħu aktar sabiex niskopru d-doni ta’ kull persuna minflok niffukaw biss fuq id-diffikultajiet li jista' jkollha.
U fuq kollox, nixtieq li ngħinu lin-nies jiskopru lil Ġesù, mhux biss permezz ta’ dak li ngħidu… imma permezz ta’ kif nittrattaw lil xulxin.
Għad Hemm Siġġu Vojt
Hemm ħaġa li nixtieq li dejjem niftakru.
Meta noqogħdu flimkien bħala The Call Ministries, tajjeb nimmaġinaw li madwar il-mejda tagħna dejjem hemm siġġu vojt.
Dak is-siġġu huwa ta’ persuna li għadna ma ltqajniex magħha.
Forsi llum dik il-persuna qed tħossha waħedha.
Forsi qed tfittex ħbieb.
Forsi tħossha mhux mifhuma.
Forsi l-fidi tagħha ddgħajfet.
Forsi ilha ma tersaq lejn il-Knisja.
Forsi qed tistaqsi jekk hemmx verament post fejn tista’ tħossha milqugħa.
Aħna għadna ma nafux isimha... Imma Alla jafha.
U forsi xi darba Alla se juża lil xiħadd minna biex jistieden lil dik il-persuna.
Għalhekk il-missjoni tagħna qatt ma tista’ ssir: “Issa għandna l-grupp tagħna. Aħna komdi.”
Komunità Nisranija ma tistax issir ċirku magħluq.
Dejjem irid ikun hemm post għal persuna oħra... Siġġu ieħor... Storja oħra... Persuna oħra li Alla jixtieq imissilha qalbha.
Għalhekk illum nixtieq ngħid: Grazzi.
Grazzi lil kull min kien parti minn dan il-vjaġġ.
Lil dawk li kienu hemm mill-bidu.
Lil dawk li ngħaqdu magħna matul it-triq.
Lil dawk li għadhom kemm waslu.
Lil dawk li jgħinu b’mod viżibbli.
U lil dawk li jgħinu fis-skiet.
Grazzi lill-familji tagħna, lill-ħbieb, lill-voluntiera, lill-leaders, lis-saċerdoti u lil kull min appoġġja lil The Call Ministries tul dawn is-snin.
Imma fuq kollox: Grazzi Mulej.
Grazzi ta’ dawn it-tmien snin.
Grazzi tal-mumenti sbieħ.
Grazzi anke tal-mumenti diffiċli li għallmuna u kabbruna.
Grazzi ta’ kull persuna li poġġejt fit-triq tagħna.
U grazzi, għax l-istorja tagħna għadha ma spiċċatx.
Illum mhux biss qed niċċelebraw tmien snin li għaddew.
Qed niċċelebraw ukoll il-vjaġġ li għadna quddiemna.
Għalhekk, hekk kif nikkonkludu din il-ġurnata flimkien, it-talba tiegħi hija sempliċi:
Mulej, kompli sejħilna.
Meta nsiru komdi, sfidana.
Meta negħjew, saħħaħna.
Meta nibżgħu, fakkarna li Int magħna.
Meta xi ħadd iħossu minsi, għinna narawh.
Meta xi ħadd ikollu bżonn sapport, għinna nagħmlulu post.
Agħtina l-kuraġġ biex ngħidulek: “Hawn aħna, Mulej. Ibgħat lilna.”
Qabel nikkonkludi, nixtieq li nieqaf għal mument biex infakkar ukoll f’dawk li kienu parti minn din il-mixja u llum m’għadhomx magħna.
Niftakru fil-membri tagħna li mietu.
Niftakru fil-benefatturi li emmnu fina, għenuna, appoġġjawna u taw sehemhom biex The Call Ministries setgħet tkompli tikber.
Niftakru f’dawk li forsi ma kienux dejjem quddiem għajnejna, imma li bl-għajnuna, bit-talb, bil-ġenerożità u bil-preżenza tagħhom ħallew marka fuq din il-familja.
Illum, f’dan l-anniversarju, ngħidu wkoll: Grazzi lilhom.
Il-kontribut tagħhom ma ntesiex.
L-imħabba tagħhom ma ntesietx.
U t-tifkira tagħhom tibqa’ parti mill-istorja tagħna.
Nitolbu biex il-Mulej jagħtihom il-mistrieħ ta’ dejjem u biex id-dawl tiegħu jiddi fuqhom.
U waqt li aħna nkomplu l-vjaġġ tagħna hawnhekk, niftakru li xi wħud minn dawk li mxew magħna issa qed iħarsu lejna minn dar oħra.
Ħa jistrieħu fis-sliem. Ammen.
Minn qalbi nawgura lill-membri kollha ta’ The Call Ministries għat-8 anniversarju tagħna. ❤️🙏🎉
Tmien snin flimkien.
Tmien snin ta’ memorji.
Tmien snin ta’ grazzja minn Alla.
U jekk Alla jrid… dan għadu biss il-bidu.
.jpg)
.jpg)
No comments:
Post a Comment