Ġesù ma jiġix biex jikkundanna, imma biex isalvana : Riflessjonijiet minn Roderick Agius fuq Ġw 3:16-18

Fl-Evanġelju naraw lil Ġesù jitkellem ma’ Nikodemu. Dan kien raġel reliġjuż, jaf il-Liġi, jaf it-tradizzjoni, jaf x’għandu jagħmel. Imma xorta waħda kellu mistoqsijiet kbar ġewwa qalbu. U naraw fatt kurjuż li mar għand Ġesù bil-lejl.

Forsi għax beża’ minn x’jgħidu n-nies.  Forsi għax ma riedx jidher.  Forsi għax ġewwa fih kien għadu fid-dlam.

U dan għalina jfisser ħafna, għax kultant aħna wkoll inkunu bħal Nikodemu. Minn barra nidhru sew, nitbissmu, immorru għax-xogħol, nieħdu ħsieb il-familja, nagħmlu li nistgħu. Imma minn ġewwa jkun hemm mistoqsijiet, biża’, ħtija, taħbit, jew sens li Alla forsi ddiżappuntat bina.

Ġesù jgħid kelma ċara: “Alla ma bagħatx lil Ibnu fid-dinja biex jagħmel ħaqq mid-dinja, imma biex id-dinja ssalva permezz tiegħu.”

Fi kliem ieħor: Alla ma ġiex biex ikissrek. Alla ma ġiex biex jgħaffġek bil-ħtija. Alla ma ġiex biex ifakkrek biss fl-iżbalji tiegħek. Alla ġie biex isalvak.

Meta Nħossuna ġġudikati

Ħafna nies illum jgħixu b’toqol kbir f'qalbhom. Eż: 

Ġenitur li jgħid: “Ma kontx preżenti biżżejjed ma’ wliedi.”  

Żagħżugħ li jgħid: “Għamilt ħafna żbalji u Alla żgur mhux kuntent bija.”  

Koppja li ilha targumenta u tgħid: “Aħna fallejna bħala familja.”  

Persuna li waqgħet f’vizzju u tgħid: “Jiena qatt mhu ser ninbidel.”

Tajjeb li noqogħdu attenti! Mhux kull ħsieb li jgħaddi minn moħħok huwa verità.

U hawn tidħol mistoqsija importanti ħafna: Dan il-ħsieb qed iressaqni lejn Alla, jew qed ibiegħdni u jagħlaqni fil-biża’?

Jekk dan il-ħsieb ġej minn Alla, għandu jwasslek għall-indiema u bidu ġdid. Imma jekk il-ħsieb ta ħtija jkissrek, u jgħidlek li għalik m'hemmx tama, dak ma jiġix minn Alla.

Alla jurina d-dnub tagħna biex ifejjaqna, mhux biex jeqridna.

Immaġina missier li jasal id-dar għajjien mix-xogħol. It-tfal storbjużi, id-dar mhux kif xtaqha, martu għajjiena wkoll. Bla ma jaħsibha jgħolli leħnu u jgħid kliem li jweġġa’.

Wara ftit, jibda jħossu ħażin. Jista’ jagħmel żewġ affarijiet.

Jista’ jgħid: “Jien dejjem hekk. Jien missier ħażin. Aħjar noqgħod kwiet.” U jingħalaq fih innifsu. 

Jew jista’ jgħid: “Żbaljajt. Imma Ġesù qed isejjaħli biex nirranġa.” U jmur jgħid: “Jiddispjaċini. Tkellimt mill-għeja, imma ma kellix inweġġgħek.”

Din hi s-salvazzjoni fil-ħajja ta’ kuljum.Mhux teorija. Mhux kliem sabiħ biss. Imma Ġesù jidħol fil-ħajja tagħma ta' kuljum u jagħtina bidu ġdid.

Kultant naħsbu li Alla jħobbna biss meta nkunu tajbin. Meta nitolbu. Meta mmorru l-Quddiesa. Meta ma niżbaljawx.

Imma l-Evanġelju jgħidilna xi ħaġa ferm akbar: “Alla hekk ħabb lid-dinja…”

Mhux Alla hekk ħabb lill-perfetti.  

Mhux Alla hekk ħabb lil dawk li qatt ma waqgħu.  

Mhux Alla hekk ħabb lil dawk li għandhom kollox f’postu.

Alla ħabb lid-dinja. U fid-dinja hawn ħafna taħwid, ħafna dnubiet, ħafna biża’, ħafna egoiżmu, ħafna firda. U xorta Alla jibqa jħobb.

Dan ma jfissirx li kollox tajjeb. Le. Id-dnub jibqa’ dnub. Dak li jweġġa’ lill-familja, lill-qalb, lill-ġisem u lir-ruħ jeħtieġ li jinbidel.

Iżda l-bidla vera tibda meta nemmnu li Alla jħobbna anke qabel ma nkunu kollox sew.

Alla jrid jibda jsalvana minn issa stess. Alla jrid idaħħal l-imħabba tiegħu fil-mod kif nitkellmu, naħfru, nisimgħu, inrabbu, inħobbu u ngħixu.

Tajjeb li nistaqsi lili nnifsi, fejn għandi bżonn id-dawl ta’ Kristu bħalissa?

F’xi relazzjoni?  F’xi vizzju?  F’xi biża’?  F’xi ħtija li ilni nġorr?  F’xi nuqqas ta’ maħfra?  F’xi deċiżjoni li qed naħrab minnha?

Nikodemu beda bil-lejl, imma ma waqafx hemm. Bil-mod il-mod mexa lejn id-dawl. U hekk jista’ jiġri lilna wkoll.

Ftakar dejjem: Ġesù ma ġiex biex jaqbdek fil-ħażin tiegħek. Ġie biex joħroġek minnu.

Ma ġiex biex jgħidlek “spiċċajt”.  Ġie biex jgħidlek “ibda mill-ġdid”.  

Ma ġiex biex jikkundannak.  Ġie biex isalvak.

U jekk illum tħossok bħal Nikodemu, miexi fid-dlam, tibżax tersaq lejn Ġesù.

Għax min jersaq lejn id-Dawl, ma jibqax l-istess.

Talba

Mulej Ġesù, nistiednek tidħol fid-dlam ta' ħajjti u fid-dar tiegħi.  

Fejjaq fija fejn hemm dgħajjef u marid.  

Agħtini l-kuraġġ nindem, nitlob maħfra u nibda mill-ġdid.  

Għinni nemmen li Int ma ġejtx biex tikkundannani,  

imma biex issalvani u tmexxini lejn il-ħajja 'l quddiem.  

Ammen.

Studju Bibbliku - Solennità tat-Trinità Qaddisa

F’dak iż-żmien, Ġesù qal lil Nikodemu: “Alla hekk ħabb lid-dinja li ta lil Ibnu l-waħdieni, biex kull min jemmen fih ma jintilifx, iżda jkollu l-ħajja ta’ dejjem. Għax Alla ma bagħatx lil Ibnu fid-dinja biex jagħmel ħaqq mid-dinja, imma biex id-dinja ssalva permezz tiegħu. Min jemmen fih ma jkunx ikkundannat; iżda min ma jemminx huwa ġa kkundannat, għax ma emminx fl-isem tal-Iben il-waħdieni ta’ Alla”.

Il-vanġelu tal-lum hu silta mid-djalogu ta’ Ġesu ma’ Nikodemu.  Huma biss tliet sentenzi, imma hemm bżonn inżidu tnejn oħra, għax fil-fatt huma meditazzjoni u riflessjoni ta’ Ġwanni wara l-Għid.  

Huma tweġiba għall-mistoqsijiet tad-dixxipli: “Imma min hu tassew dan Ġesu ta’ Nazareth, dan Ġesu li qattajna tliet snin ngħixu u nieklu miegħu, li qallbilna ħajjitna ta’ taħt fuq u l-mod kif naħsbuha u nirraġunaw, u l-mod kif inġibu ruħna m’Alla u mal-bnedmin,  ma’ min jiżbalja u jidneb, fuq il-flus, il-familja, is-sesswalita’? 

Min hu dan Ġesu li biddel id-dinja, u beda ordni uman ġdid?”  Is-silta tal-lum twieġeb dawn il-mistoqsijiet.  Hija frott tal-meditazzjoni tal-komunita’, u Ġwanni jippreżentaha madwar sittin sena wara, iggwidat mill-Ispirtu s-Santu.

Għaliex Ġwanni daħħal din is-silta bħala parti  mid-djalogu bejn Ġesu u Nikodemu?  Għax dan il-Fariżew hu simbolu ta’ wieħed miexi fid-dlam tal-lejl u li qed ifittex id-dawl.  Hemm ftit minn Nikodemu f’kull wieħed u waħda minna, għax aħna il-ħin kollu infittxu d-Dawl.

Nikodemu jagħmel mixja – jiġi fid-dalma tal-lejl u jerġa’ jmur fid-dlam.  Jerġa’ jidher fis-Sinedriju meta jaqbeż għal Ġesu: “Il-liġi tagħna tgħid li nistgħu niġġudikaw bniedem qabel ma nisimgħu x’qed jagħmel, x’qed jgħid u kif qed jgħix?” Sħabu l-Fariżej insultawh: “Mela ma tafx li l-ebda profeta mhu se joħroġ mill-Galilija?” 

Fl-aħħar, Nikodemu jsib id-dawl, u narawh ġej bil-fwejjaħ biex jidlek lil Ġesu qabel id-difna.  Għaraf li Ġesu kien l-Għarus li tant ħabb l-umanita’ li ta ħajtu għaliha. 

Hawn Ġwanni jagħti t-tweġiba tiegħu lill-Komunita’ Nisranija.  Wara sittin sena, x’opinjoni iffurmaw fuq Ġesu ta’ Nazareth?  “Ġesu, wara li ħabb lil Tiegħu, ħabbhom sal-aħħar,” billi  wera mħabbtu b’mod li ma setax jagħmel aktar milli għamel, milli ta l-istess ħajtu għalihom.

Ġwanni għaraf li Ġesu hu r-rivelazzjoni tal-Missier:  “Alla hekk ħabb lid-dinja li ta lil Ibnu l-waħdieni biex, kull min jemmen, ma jintilifx imma jkollu l-ħajja ta’ dejjem”.

(a) L-ewwel riflessjoni: Alla  mhux dak li jikkastiga, jikkundanna u jippreferi poplu minn ieħor, imma li, permezz ta’ Ġesu, wera ruħu bħala Imħabba bla limiti.  (“Imħabba” nsibuha 110 darba fit-Testment il-Ġdid; 72 minnhom fi Ġwanni). L-iskop ta’din l-Imħabba hija r-rigal tal-ħajja, l-aktar dik eterna:  “..ikollu l-ħajja ta’dejjem” mhux biss wara l-mewt imma anki issa.  

Ġesu qal lil Nikodemu: “Dak li jitwieled mill-ġisem hu ġisem; li jitwieled mill-Ispirtu hu spirtu.” Dak in-nhar li jien twelidt fl-Ispirtu, jien bdejt ngħix il-ħajja tal-Etern, il-ħajja Divina, il-ħajja ta’ Alla l-Għoli.  Id-dixxipli fehmu li l-Missier irid jagħti l-ħajja eterna bħala rigal lil kull wieħed minna.

(b) It-tieni:  Alla ma bagħatx lil Ibnu fid-dinja biex jagħmel ħaqq minnha, biex jippremja t-tajbin u jikkastiga lill-ħżiena.  Il-Fariżej kienu jirraġunaw hekk.  Imma fil-fatt, Alla hu Missier kulħadd, anki dawk li ma jħallux lil Ġesu iġib il-ħajja eterna f’ħajjithom. Fraġli kemm huma fraġli, Alla xorta jridhom isalvaw, bħalma jrid lil kulħadd isalva permezz t’Ibnu.

(c)  It-tielet: “…fid-dinja” – fi Ġwanni id-dinja tirreferi għan-nies li ma jilqgħux l-aħbar it-tajba.  Għalhekk Alla bagħat lil Ibnu fid-dinja biex dawn isalvaw, jiġifieri li jirrejalizzaw l-identita’ tagħhom ta’ bnedmin, maħluqin xbieha t’Alla; li jiżviluppaw fihom l-imħabba ta’ Ġesu u jħallu dil-ħajja Divina toħroġ fil-beraħ.  Jekk titfa’ żerriegħa fil-ħamrija, biex issalvaha trid tħalliha tiżviluppa u tikber. Jekk tibblokka lil Ġesu milli jiber fik billi ma tħobbx, ma tistax issalva.  [Hawn mhux qed nitkellmu fuq meta tmut fil-grazzja t’Alla u tmur il-Ġenna, imma issa f’dil-ħajja, kif għadna kif spjegajna.

(d) Ir-raba’: “Min jemmen, ma jkunx iġġudikat”. “Jemmen”  tfisser  jaċċetta l-proposti u t-tagħlim ta’ Ġesu, u jħalli d-dawl Tiegħu imexxilu ħajtu.  Kważi kważi l-anqas ikollu bżonn tal-Kmandamenti għax ikun l-istess Spirtu li jkun qed imexxih kif imiss.

(e) Il-ħames: “Min ma jemminx” ikun qed jirrifjuta l-proposti ta’ Ġesu u jħalli l-egoiżmu biss imexxilu ħajtu.  “Ġa kkundannat” għax ikun qed jirrifjuta l-ħajja, jirvina l-eżistenza tiegħu ta’ bniedem u jirriduċieha għall-vojt, għall-baħħ, għal ħaġa bla sens.  Mhux Alla jikkundanna imma dat-tip ta’ bniedem ikun qed jikkundanna lilu nnifsu.  Nerġa’ ngħid:  salvezza u kundanna f’dil-ħajja, mhux ta’ wara l-mewt.

Author: Joe Farrugia Segretarjat għal-Lajċi

Meta Ġesù Jidħol Fid-Dar Tagħna: Riflessjonijiet minn Roderick Agius fuq Ġwanni 20:19-23

Fl-Evanġelju naraw lid-dixxipli magħluqin ġewwa. Kienu mbeżża’. Kienu konfużi. Kienu għadhom qed jippruvaw jifhmu x’ġara wara l-mewt ta’ Ġesù. U f’dak il-mument, meta kollox kien jidher mitluf, Ġesù jidħol f’nofshom u jgħidilhom: “Is-sliem għalikom.”

Kemm għandna bżonn nisimgħu din il-kelma llum. Għax anke llum ħafna żgħażagħ u familji jgħixu wara bibien magħluqa. Mhux dejjem bibien tad-dar, imma bibien fil-qalb.

• Bibien magħluqa bil-biża’.
• Bil-weġgħat.
• Bl-ansjetà.
• Bil-pressjoni.
• Bis-silenzju.
• Bil-ħsieb li “jien mhux biżżejjed”.

U proprju hemm, Ġesù jidħol. Hu ma jistenniex li nkunu perfetti. Ma jistenniex li jkollna kollox ċar. Ma jistenniex li l-familja tagħna tkun bla problemi.

Ġesù jidħol fejn qegħdin, anke meta L-qalb tkun magħluqa.

Illum ħafna żgħażagħ qed jgħixu taħt pressjoni kbira. Pressjoni biex jirnexxu. Pressjoni biex jidhru tajbin. Pressjoni biex ikollhom relazzjoni, karriera, flus, followers, direzzjoni u futur ċar.

U kultant, minkejja li wieħed ikun mdawwar b’ħafna nies, jew online, ġewwa fih xorta jkun jħossu waħdu.

Fil-familji tagħna jiġri l-istess ukoll. Inkunu fl-istess dar, imma mhux dejjem inkunu qrib ta’ xulxin. Nitkellmu fuq ħafna affarijiet, imma kultant nevitaw dak li verament qed iweġġagħna.

F’dawn il-mumenti Ġesù ma joqgħodx ’il bogħod. Hu jidħol u jgħidilna: “Is-sliem għalikom.”

Mhux paċi falza. Mhux paċi li taħbi l-problemi. Imma paċi li tagħtina l-kuraġġ inħarsu lejn il-verità, nitkellmu b’imħabba, u nerġgħu nibdew mill-ġdid.

Nistaqsi - X’hemm ġewwa fija li qed jillimitani bħalissa: il-biża’, il-kburija, xi weġgħa, jew il-ħsieb eż. li m’iniex biżżejjed?

Huwa tajjeb li nirrispondu ġenwinament din il-mistoqsija għax il-paċi ta' veru tibda minn ġewwa.

Ġesù jgħid “Is-sliem għalikom” darbtejn. Għax jaf li l-qalb tal-bniedem mhux dejjem temmen mill-ewwel.

Kultant aħna wkoll nisimgħu ħafna kliem sabiħ, imma ġewwa fina nibqgħu ngħidu:

• “Imma jien għadni mweġġa’.”
• “Imma jien għamilt ħafna żbalji.”
• “Imma l-familja tiegħi diffiċli.”
• “Imma Alla żgur għajja bija.”

Le, Alla ma għajjiex bik! 

Ġesù jidħol fil-ħajja tiegħek bil-paċi tiegħu. U ħafna drabi din il-paċi tibda b’pass żgħir eż: ma tgħaġġilx qabel tirreaġixxi, tkun ħelu fi kliemek flok tuża kliem iebes, tibgħat messaġġ lil xi ħadd li ilek ma tkellem jew tgħid “jiddispjaċini”.

Dawn huma passi żgħar, imma quddiem Alla għandhom valur kbir.

Ngħamlu tajjeb li ngħarfu liema pass żgħir ta’ paċi nistgħu nagħmlu fil-ħajja taghna

L-Evanġelju jgħidilna li Ġesù wera lid-dixxipli idejh u ġenbu. Wera l-ġrieħi tiegħu. 

Dan jgħallimna xi ħaġa sabiħa ħafna: Ġesù ma jaħbix il-ġrieħi. Hu jbiddilhom f’sinjali ta’ mħabba.

Forsi inti wkoll għandek feriti. Forsi ġej minn passat diffiċli. Forsi kellek relazzjoni li weġġgħetek. Forsi qed iġġorr dispjaċir, dnub, mistħija, rabja jew niket. Forsi bħala familja hemm affarijiet li qatt ma ġew mitkellma.

Għal Ġesù, dawn il-feriti u weġgħat m'humiex it-tmiem jew xi telfa.

Hu jista’ jfejjaq. Hu jista’ jerġa’ jibni. Hu jista’ jagħti bidu ġdid.

Dan iseħħ biss jekk inħalluh jidħol fil-ħajja tagħna.

Nistaqsi - X’ferita għandi bżonn inġib quddiem Ġesù biex jibda jfejjaqha?

Ġesù nefaħ fuqhom u qalilhom: “Ħudu l-Ispirtu s-Santu.”

llum l-Ispirtu s-Santu għandna bżonnu aktar minn qatt qabel.

• Għandna bżonnu biex nagħżlu t-tajjeb meta kollox madwarna jgħidilna nagħżlu dak li hu faċli.
• Għandna bżonnu biex naħfru meta qalbna tkun iebsa.
• Għandna bżonnu biex nitkellmu meta l-ħitan ikunu għoljin u s-silenzju joqtol ir-relazzjonijiet.
• Għandna bżonnu biex nieħdu deċiżjonijiet tajbin dwar il-futur, ir-relazzjonijiet, ix-xogħol u l-familja.

L-Ispirtu s-Santu mhux biss għall-Knisja. Hu qiegħed hemm għall-ħajjitna kollha.

Ejjew nitolbu din it-talba - “Spirtu s-Santu, mexxini. Għinni nagħżel dak li hu tajjeb.”

Ngħamlu tajjeb li nistaqsu lilna nfusna: F’liema deċiżjoni għandni bżonn nitolb lill-Ispirtu s-Santu jmexxini?

Ġesù jitkellem ukoll fuq il-maħfra tad-dnubiet. Għalina bħala Insara Kattoliċi, dan ifakkarna fis-Sagrament tal-Qrar, li huwa rigal kbir ta’ ħniena u okkażjoni li jagħtina bidu ġdid.

Min jaf kemm hawn familji li jgħixu taħt l-istess saqaf imma qalbhom tinsab 'il bogħod ?

Kemm drabi nżommu ġewwa  qalbna dak li weġġagħna?

Kemm drabi l-kburija żżommna milli ngħidu: “Jiddispjaċini jew aħfirli”?

Il-maħfra ma tfissirx li dak li ġara, għadda qisu xejn m'hu xejn jew ma kienitx xiħaġa importanti. Il-Maħfar tfisser li l-weġgħa ma tibqax tikkontrollalek l-emozzjonijiet tiegħek u l-ħajjtek.

Tkun Nisrani tajjeb mhux għax qatt ma tiżbalja. Imma għax meta tiżbalja, terġa’ ddur lejn Ġesù.

Il-qari jikkonkludi b'Ġesu jagħti mandat: “Kif il-Missier bagħat lili, hekk jien nibgħat lilkom.”

Dan ifisser li l-fidi mhijiex biss xi ħaġa privata. M'hijiex biss għal ġewwa l-Knisja. Il-fidi trid issir ħajja billi ngħixuha kuljum. Fid-dar, fuq il-post tax-xogħol, fl-università, mal-ħbieb, online, fil-grupp jew fil-parroċċa.

Talba

Mulej Ġesù, nistednuk tidħol ġewwa djarna. Idħol fil-biżgħat u fil-weġgħat tagħna. Ejja u agħtina l-paċi tiegħek.

Imla qlubna bl-Ispirtu s-Santu u għinna naħfru, nerġgħu nibdew mill-ġdid, u nkunu persuni li nwasslu t-tama tiegħek.

Għinna noħorġu u ma nibqgħux imwaħħlin u magħluqin fil-biża’, iżda użana sabiex iħobbu, naqdu u nwasslu d-dawl tiegħek.

Amen.

Ħudu l-Ispirtu s-Santu - Solennità ta’ Għid il-Ħamsin - Studju Bibbliku Ġw 20, 19-23

Dak il-Ħadd fil-għaxija, fl-ewwel jum tal-ġimgħa, meta d-dixxipli kienu flimkien imbeżżgħa mil-Lhud, bil-bibien magħluqa, ġie Ġesù u qagħad f’nofshom; u qalilhom: “Is-sliem għalikom!”. Kif qal hekk, uriehom idejh u ġenbu. Id-dixxipli ferħu meta raw lill-Mulej. Imbagħad Ġesù tenna jgħidilhom: “Is-sliem għalikom! Kif il-Missier bagħat lili, hekk jien nibgħat lilkom”. Kif qal hekk, nefaħ fuqhom u qalilhom: “Ħudu l-Ispirtu s-Santu. Dawk li taħfrulhom dnubiethom ikunu maħfura, u dawk li żżommuhomlhom ikunu miżmuma”.

Illum jagħlaq żmien il-Ġħid:  ħamsin jum fejn rajna r-raġuni tal-eżistenza tagħna permezz tal-mewt u l-qawmien ta’ Ġesu.  Is-silta terġa’ teħodna f’jum il-Qawmien filgħaxija meta l-Appostli raw lil Kristu rxoxt: “raw” mhux biss bl-għajnejn materjali imma b’tal-Fidi wkoll: “imberkin ta’ qalbhom safja, għax dawn jaraw ‘l Alla.”  L-Appostli ferħu għax raw kif u fejn spiċċat il-ħajja ta’ min jagħti lilu nnifsu għall-oħrajn.  Jekk aħna jkollna qalb safja, jirnexxilna wkoll naraw lil Kristu kif rawh l-Appostli.

“Ġesu ġie u qagħad f’nofshom”: mhux “dehrilhom”, qisu xi ruħ.  Issa għandu preżenza stabbli ġdida li setgħu jarawha  dawk li jaraw bl-għajnejn tal-Fidi.  Qabel il-Qawmien, Ġesu normalment seta’ jkun f’post wieħed u ħdejn dawk ta’ madwaru (jekk mhux b’xi miraklu).  Issa  seta’ u għadu jista’ jkun preżenti f’kull komunita’ (fejn hemm tnejn jew tlieta…).   Aħna żgur ħassejna dil-preżenza f’ħajjitna, bħalma wkoll ħassejna n-nuqqas tagħha f’mumenti ibsin jew ta’ qtigħ il-qalb.

“Il-paċi magħkom.” Urihom idejH u l-kustat.  Dawn se jsiru l-identita ta’ Ġesu.  L-idejn, fil-kunċett Semitiku,  jirrappreżentaw il-qawwa, il-poter  u x-xogħol li jwettqu.  Fl-Antik Testment, l-Id t’Alla kienet interpretata bħala dik li wettqet il-ħolqien, imma anki bħala kastig: “Il-leminija Tiegħek farrket l-għedewwa.” (Esodu).  Ġesu ried jikkoreġi din l-idea. 

Wera jdejH lid-dixxipli u qalilhom: “Hekku l-idejn t’Alla: l-istess idejn li ħaslu riġlejn l-Appostli, qdew u wettqu atti ta’ mħabba.”  Dan ifisser li Alla ġie biex iservi u mhux biex jiġi servut.  Poġġa jdejH għas-servizz tal-bnedmin.  Idejn Kristu ġew imsammra ma’ salib biex juru li idejn Alla mhux se jikkundannaw u jikkastigaw imma se jgħannqu u jħobbu anki l-akbar midneb.  Dawn l-idejn missew l-imġiddmin, l-għomja, z-zopop u l-mitrugħin.  Ħaddnu saħansitra t-tfal u b’hekk skandalizzaw lid-dixxipli, għax it-tfal kienu meqjusin bħala mpuri.  Idejn Alla ġew irrivelati f’idejn Kristu.  Idejna jridu jsiru jixbhu lil dawn l-idejn, biex,  meta jkomplu x-xogħol ta’ Kristu, Alla jissebbaħ.

Il-Kustat: hawn min jaħseb li Ġesu aħjar ma sofriex dik il-passjoni kollha; jew issa li ġrat aħjar ninsewha.  Il-kustat minfud b’lanza ifakkarna l-ħin kollu fil-Passjoni, f’Alla u fl-imħabba kbira li wera għalina.  Dawn il-feriti juruna l-wiċċ veru t’Alla li jħobb sal-għotja totali Tiegħu nnifsu.  Juruna wkoll l-identita’ ta’ Ġesu, il-quċċata tal-imħabba Tiegħu, dik ta’ namrat miġnun bl-imħabba wara n-namrata tiegħu.  Mill-kustat ħarġu demm u ilma.  Id-demm hu simbolu tal-ħajja, dik mogħtija lilna li twassalna għall-ħajja ta’ dejjem, ħajja li l-ebda mewt ma tista’ tmissa.  Il-qtar tal-ilma huma simbolu tal-Ħajja Divina, il-Ħajja tal-Ispirtu.

L-Appostli ferħu meta raw lil Ġesu, għax min jiftaħ għajnejh beraħ u jara bl-għajnejn tal-Fidi, ma jistax ma jifraħx meta ħajtu tkun imdawwla b’dan il-mod.

“Kif il-Missier bagħat lili hekk jien nibgħat lilkom. Morru! Komplu dak li bdejt jien.  Komplu ġibu l-bidla fid-dinja bi preżenza tanġibbli u Sagramentali tal-Qawmien. Uru dawn il-pjagi Tiegħi bħala prova tal-imħabba Tiegħi għall-bnedmin.  Intom ukoll sofru dawn il-ġrieħi jekk ikun hemm bżonn.”  Anki aħna mitlubin inkunu ta’ servizz għall-oħrajn.  Mhux bil-fors immutu martri, imma nistgħu nissagrifikaw ftit minn ġidna (“Give till it hurts” – Madre Tereża), u mill-ħin tagħna għall-oħrajn. 

Il-Knisja għalhekk teżisti, biex b’dawn l-atti ta’ karita’ iżżomm ħajja l-immaġini ta’ Kristu Rxoxt.  Nistgħu nħossuna dgħajfin u mgħaġġba kif Ġesu’ ħalla dil-missjoni hekk importanti f’idejna l-bnedmin.  Imma rridu niftakru fil-wiegħda Tiegħu li se jkun dejjem fil-preżenza tagħna.

Permezz ta’ dil-preżenza jtina l-qawwa mhux ta’ din l-art imma tal-Ispirtu Divin Tiegħu.  Din l-enerġija Divina li rċieva minn għand il-Missier, u li tatu l-qawwa biex jagħti ħajtu, ma ħadhiex il-Ġenna, imma għaddieha lid-dixxipli Tiegħu.

“Nefaħ fuqhom u qal: ‘Irċievu l-Ispirtu s-Santu.’”  Il-kelma “nefaħ” smajniha l-ewwel darba fil-ġnien tal-Eden, fejn, permezz tagħha,  ċappa tajn saret bniedem.  L-istess kelma, użata hawn issa, se ġġib it-twelid tal-bniedem il-ġdid, bnedmin ġodda li jistħoqqilhom it-titlu ta’ “Ulied Alla.” 

“Id-dnubiet li intom taħfru…”  Il-Konċilju ta’ Trentu kien iddikjara li b’dawn il-kelmiet Ġesu waqqaf is-Sagrament tal-Qrar.  Veru, imma dawn il-kelmiet ma jgħoddux għas-sażerdoti biss.  Kull Nisrani għandu d-dmir li  jħajjar lil kull midneb biex jabbanduna t-triq tad-dnub, u jerġa’ jaqbad it-triq tal-Grazzja.

Author: Joe Farrugia Segretarjat għal-Lajċi

Il-Missjoni tibda fid-dar - Riflessjonijiet minn Roderick Agius Ġw Mt 28, 16-20

Fl-Evanġelju tal-llum naraw lil Ġesu' jiġbor lid-dixxipli tiegħu għall-aħħar darba qabel jitla fis-sema. Hu qiegħed hemm iħares lejhom, u qed jara persuni ordinarji, persuni li kienu mbeżża', forsi ukoll konfużi; persuni mimlijin difetti li saħansitra jiddubitaw. U Hu jagħtihom missjoni straordinarja.

Morru, mela, agħmlu dixxipli mill-ġnus kollha . . .


Ġesu' ma qagħadx jistenna li dawn ikunu perfetti! Iżda Ġesu' għażel persuni ta' rieda tajjba.

U dan il-fatt għalina jiswa' ħafna, għax aħna ukoll naqgħu taħt din il-kategorija ta' persuni. Iva, Ġesu' jista' jaħdem bik, u bil-familja tiegħek; jista jaħdem bik minkejja li għandek it-taħbit jew tħoss li fil-ħajja għadek ma wasalt imkien.

Fil-qari hemm miktub ċar: . . . xi wħud iddubitaw iżda Ġesu' xorta afda fihom.

Illum aktr minn qatt qabel, ħafna persuni jinsabu għajjenin, għax forsi djarhom mimlija stress u storbju jew bil-maqlub mimlija b'vojt u silenzju u s-saltan is-solitudni. Ħafna żgħażagħ iħossuhom mitlufin minħabba l-aspettattivi tal-ħajja, diffikultajiet biex ikollhom relazzjoni, anzjetajiet jew biża' li mhux qed jgħamlu biż-żejjed.

F'dawn ir-rejatajiet u ċ-ċirkustanzi kollha, Hu ma joqgħodx ilbogħod u jiġġudika, iżda jersaq fil-qrib u jgħidilna: U ara, jiena magħkom dejjem.

Mhux biss fil-Knisja, jew meta kollox ikun sewwa, iżda dejjem!

Anke meta jkollna l-argumenti jew meta ma nħossuniex mifhuma. Jew meta nkunu għajjenin jew inħossuna waħedna. Ġesu' jibqa' preżenti.

U jgħidilna: Morru, . . 

Fi kliem ieħor qed jgħidlek, tibqax imwaħħal fil-biża'. Tibqax imwaħħal fejn qiegħed. Tibqax maqbud f'dawn iċ-ċrieki li tħossok ma tistax tinqala minnhom.

Ejjew inpoġġu lil Ġesu' f'ħajjitna. 

Infakkrek, li biex tkun nisrani tajjeb m'hijiex kemm tkun perfett, iżda li f'kull ċirkustanza jew okkażjoni iddur lejh. Tkun nisrani tajjeb, meta  eż tiżbalja u ma taqtax qalbek iżda terġa' tipprova jew meta taħfer u ma tħallix li qalbek tkun iebsa.

F'kemna waħda meta l-Imħabba tkun akbar mill-Jiena (Ego)

Id-dinja ta' madwarna ser tibqa tibbumbardjana sabiex ikollna l-followers, jew ikollna status ta' suċċess, iżda Ġesu' qed jistedinna għal xiħaġa akbar: li jkollok ħajja bi skop!

Illum huma ħafna dawk li qed iħossuhom mitlufin u qed ifittxu.

Forsi online jista' jkollna ħafna ħbieb iżda xorta nħossuna waħedna.

Illum ninsabu mdawwrin b'ħafna affarijiet materjali u minkejja dan ġewwa fina hemm il-vojt!

Ġesu' llum qed jagħtina skop, qed jgħamlilna sejjħa sabiex inkunu dawl u nġibu t-tama, u nfakkru lil kulħadd li Alla għadu jħobb, għadu jfejjaq u għadu jsejjaħ.

L-akbar missjoni li għandna quddiemna m'hijiex f'xi pajjiż remot in-naħa l-oħra tad-dinja, iżda hawn fejn qiegħdin. Fid-dar, fuq il-post tax-xogħol u kull fejn inkunu, billi nagħtu kelma ta' nkuraġġiment, inqattgħu ħin taħ kwalita' ma dawk qrib tagħna. Meta tieħu ħsieb iċċempel lil dik il-persuna li taħseb li tista' għaddejja minn xi diffikulta' u tgħin fejn tista'. Li titlob u li tagħżel tkun paċenzjuż flok taqbeżiċ-ċinga.

Azzjonijiet żagħar mimlija mħabba jsiru sinjal ċar u ħaj tal-preżenza t'Alla.

Ftakar dejjem: Ġesu' ma jgħidx li ser ikun hemm biss meta tirnexxi, iżda qed jgħidilna li qiegħed hemm dejjem.


Amen

Lili ngħatat kull setgħa fis-sema u fl-art - Tlugħ tal-Mulej fis-Sema - Studju Bibbliku Mt 28, 16-20

F’dak iż-żmien, il-ħdax-il dixxiplu telqu lejn il-Galilija u marru fuq il-muntanja fejn kien ordnalhom Ġesù. Kif rawh, inxteħtu quddiemu, għalkemm xi wħud iddubitaw. Ġesù resaq ikellimhom u qalilhom: “Lili ngħatat kull setgħa fis-sema u fl-art. Morru, mela, agħmlu dixxipli mill-ġnus kollha, u għammduhom fl-isem tal-Missier u tal-Iben u tal-Ispirtu s-Santu, u għallmuhom iħarsu dak kollu li ordnajtilkom jien. U ara, jiena magħkom dejjem, sa l-aħħar taż-żmien”.

Dis-silta tagħlaq l-Evanġelju ta’ San Mattew, fejn rajna l-ħajja ta’ Ġesu fuq din l-art, it-twelid f’Betlem, it-trobbija f’Nazareth, u l-ħidma f’Kafarnaum u Ġerusalemm.  B’ebda mod m’għandna nqisu dis-silta bħala t-tmiem tal-ħidma ta’ Ġesu fuq din l-art. Pjuttost hija bidu. 

Ġesu se jidħol fid-dar tal-Missier u jħalli l-Missjoni tiegħu f’idejn l-Appostli.  Ordnalhom biex jinġabru fil-Galilija, fuq il-muntanja tal-Beatitudni.  Muntanja tal-ġebel imma wkoll waħda li tirrappreżenta l-post fejn il-bnedmin setgħu jaċċettaw u jassimilaw il-ħsibijiet t’Alla.  Kien il-post fejn wieħed seta’ jara l-Baħar tal-Galilija u Kafarnaum, fejn Ġesu żvolġa ħafna mill-ministeru tiegħu. Kien hawn li Ġesu sejjaħ l-ewwel Appostli.  Illum, mill-istess post, se jagħti l-mandat lill-Ħdax biex jibdew il-Knisja Tiegħu, il-Komunita’ Ġdida: ħdax għax jonqos wieħed, l-anti-dixxiplu, dak, u kull min hu bħalu, li ma telgħax dil-muntanja biex iħaddan il-Beatitudni, u b’hekk ma setgħax jagħmel esperjenza tal-Qawmien.

Min jagħmel hekk ikun qed jagħżel id-dinja l-antika: poter, regħba, vjolenza.  Minn flok, Ġesu jagħti bidu għas-Saltna Tiegħu b’dawn il-ħdax l-Appostli, imbeżżgħin, fraġli, mimlija dubji u nċertezzi. Dawn kienu persuni li ħarbu mill-ġnien taż-żebbuġ u ħallew lil Ġesu waħdu. Għamlu żbalji oħra.  Il-kap tagħhom ċaħdu wkoll.  Minkejja did-dgħufija kollha, qallhom  biex jinġabru hawn illum.

“Kif rawh inxteħtu quddiemu.”  Il-verb “rawh” hawn ifisser aktar milli tara bl-għajnejn materjali. Dawn huma persuni li laqgħu il-Beatitudni, allura għarfu ‘l Ġesu u l-missjoni tiegħu, dik li jagħti ħajtu għalina.  Aħna wkoll għandna bżonn nitilgħu fuq dil-muntanja, naċċettaw u nwettqu l-Beatitudni, biex ukoll aħna “naraw” li s-sejħa tagħna hija li l-ħajja se tkun mimlija meta ngħixu m’Alla u f’Alla. 

“Inxteħtu quddiemu”, jew adurawh, għarfu l-preżenza t’Alla f’Ġesu, il-wiċċ t’Alla stampat f’wiċċ Ġesu: dan hu Alla li jagħti lilu nnifsu, mhux xi alla tal-filosfi jew poeti. 

“Xi wħud iddubitaw.”  Fejn tidħol il-Fidi, ez. fil-Qawmien, m’għandniex provi jew ċertezzi imma raġunar.  Mela normali li jkollna d-dubji. 

Ġesu ma jibżax mid-dubji tagħna għax jaf li aħna umani. In fatti lid-dixxipli ma ċanfarhomx.  Mill-banda l-oħra, kieku jkollna l-provi konkreti,  ma jkollniex bżonn il-Fidi.  Mela meta jkollna d-dubji għandna naċċettawhom bil-kalma. 

Aktarx il-bidu tad-dubji hu l-ewwel Beatitudni: “Henjin il-fqar fl-ispirtu”. Xi wħud jirrispondu: “Kif, Mulej?  Irrid nirrinunċja għal kollox? Nagħti kollox lill-fqar?”  Dan ir-raġunar inibbet id-dubji fina.  Ġesu jaf b’dan, u jagħtina l-għajnuna u l-qawwa biex nifhmu sew dil-proposta tiegħu li tfisser: Henjin dawk li jghazlu li jghixu fis-semplicita kif qed jipproponi Gesu’ permezz tal-evengelju. Li bil-mod kif qed jipproponi Gesu biex nghixu, ghandu jwassalna li ma jkun jonqosna xejn ! Fid-Dinja hawn bizzejjed ghal-kulhadd biex jghix b’mod dinjituz. Fqar mil-egoizmu u l-kilba u sinjuri fl-imhabba u fl-altruizmu. Hieni min jilqa dan l-istess messagg.

Dment li nibqgħu fuq il-livell tal-Muntanja, jirnexxielna nilqgħu dil-proposta bid-dubji li ġġib magħha.  Jekk nitbiegħdu mill-Muntanja, nibdew infittxu provi konkreti, umani, xjentifiċi.  Il-Fidi rridu nmantnuha l-ħin kollu bil-Kelma t’Alla, inkella tiddgħajjef.

“Ġesu resaq lejhom”. Ġesu tielgħa s-Sema.  Ma jfissirx li se jitlaq (“Jien nibqa’ magħkom għal dejjem”).   L-Irxoxt jersaq lejn id-dixxipli, u se jibqa’ qrib tagħhom, għax lil dawn se jafdalhom il-missjoni tiegħu. 

“Kull qawwa ngħatat lili..” Mhux dik li biha ttentah ix-xitan fid-deżert, qawwa li tiddomina bil-forza.  Imma l-qawwa t’Alla, tal-imħabba, dik li tagħti ħajtek għall-oħrajn.  Ġesu għandu dil-qawwa fil-milja kollha tagħha.  Issa se jgħaddiha lid-dixxipli.

“Morru, mela….”  Morru, ibdew, għamlu lil kulħadd dixxipli, ħajruhom jaċċettaw il-proposti tal-Beatitudni.  Kulħadd, i.e. il-ġnus kollha.  Għall-Lhud din kienet idea ġdida.  Huma biss kienu l-poplu t’Alla, huma biss kienu se jsalvaw.   Imma l-pjan t’Alla kien li huma jikkonvertu ġnus oħra, mhux iżommu s-salvazzjoni għalihom biss.

“Għammduhom…”  “Battizzare” propjament tfisser “immersjoni”, tniżżel taħt l-ilma. Mela l-ewwel dixxipli, u aħna l-Insara (id-dixxipli tal-lum), għandna l-obbligu li nħajru kull bniedem, ta’ kwalunkwe  razza, biex “jegħreq” fil-Missier, l-Iben u l-Ispirtu s-Santu, jiġifieri, bis-simbolu tal-ilma mraxxax fuq rasu jew imdawwar ma’ ġismu kollu, hu jidħol jagħmel parti mill-ħajja Divina, il-ħajja tat-Trinita’.

“…. kulma għallimtkom jien…” fuq kollox il-Beatitudni.

“Jien magħkom dejjem”.  Ġesu m’huwiex “hemm fuq” imma qiegħed magħna u qed jakkumpanjana f’kull pass li nagħmlu.  Il-missjoni tal-Knisja llum hi li żżomm preżenti lil Kristu f’ħajjitna.  U aħna mbagħad irridu nkunu xhieda ta’ Kristu Rxoxt.

Awtur: Joe Farrugia Segretarjat għal-Lajċi

Ma nħallikomx iltiema - Riflessjonijiet minn Roderick Agius Ġw 14, 15-21

 

Illum qed ngħixu ħajja fejn ħafna persuni jħossuhom għaddejjin minn battalja kontinwa.

Min imħabbat u stressjat, anke illum tisma b'ġenituri litteralment eżawriti u ssib min jgħidlek lanqas biss għadna kapaċi nitkellmu bil-kwiet flimekien.

Tfal u żgħażagħ iħossuhom li m'humiex mifhuma, jew anke jesperjenzaw vojt ġewwa fihom.

U xi kultant nintebħu li għal kemm fi djarna inkunu diveri persuni preżenti, xorta inħossun waħedna.

Ġesu illum qed jgħidilna kelma b'saħħitha: “Ma nħallikomx iltiema. Nerġa’ niġi għandkom.”

Ġesu' ma jwiegħedx perfezzjoni, jew li ser ngħixu bla taħbit, iżda jwiegħdna l-preżenza tiegħu. U dan il-fatt ibiddel kollox!

F'dar ilbogħod mill-fidi, faċli ssaltan it-tensjoni, ir-rgħabbja, il-kburija u jittellgħu il-ħitan. Min naħa l-oħra, meta nistiednu l-Ispirtu s-Santu f'dik id-dar jerġa jfeġġ is-sliem, u ftit ftit jibda jseħħ il-fejqan.

Mhux għax aħna perfetti, iżda għax Alla hu preżenti.

Ġesu' jgħid ukoll: “Jekk tħobbuni, ħarsu l-kmandamenti tiegħi."

Inkunu nsara tajjbin, meta l-imħabba tagħna tirriflett fl-azzjonijiet tagħna.

• Meta nkunu kalmi u paċenzjużi flok taqbżilna.
• Meta nisimgħu aktar milli ngħajjtu.
• Meta naħfru malajr
• Meta nkunu preżenti.
• Meta nitolbu flimkien
• Meta nisimgħu, minflok niġġudikaw.

Xi drabi miraklu jista' jseħħ meta eż. missier jieqaf jisma' lil ibnu jew lil bintu, jew omm li tibqa tħobb minkejja ċ-ċirkustanza li tkun kuntrarja.

Jew meta koppja tgħażel li terġa tibda mill-ġdid.

Ġesu' jwiegħed hekk: "U jiena nitlob lill-Missier, u hu jagħtikom Difensur ieħor biex jibqa’ magħkom għal dejjem."

Setenza ta' kuraġġ kbir, għax qed jgħidilna li mhux ser iħallina nissieltu waħedna. Hu qiegħed hemm fil-ħajja tagħna ta' kuljum; waqt li qed nieklu, fid-diffikultajiet, fil-mard, fid-diżgwid, fil-maħfra etċ . . 

Ġesu' illum qed ifakkrek li m'intix abbandunat/a !

Anke jekk ir-relazzjoni sejjra ħażin, anke jekk il-fidi tinħass dgħajjfa, anke meta tħossok imtaqqal.

Ġesu' għadu qed iħabbat il-bieb tal-qalb tiegħek, u meta tiftaħlu terġa tfeġġ it-tama, il-paċi tiżdied u l-qalb tibda tfiq.

Jiena nitlob il-Missier, u hu jagħtikom Difensur ieħor - Studju Bibbliku Ġw 14, 15-21- Is-Sitt Ħadd tal-Għid sena

 F’dak iż-żmien, Ġesù qal lid-dixxipli tiegħu: “Jekk tħobbuni, ħarsu l-kmandamenti tiegħi. U jiena nitlob lill-Missier, u hu jagħtikom Difensur ieħor biex jibqa’ magħkom għal dejjem, l-Ispirtu tal-verità, li d-dinja ma tistax tirċevih, għax hija la tarah u lanqas tagħrfu. Iżda intom tagħrfuh, għaliex jgħammar magħkom, u huwa fikom. Ma nħallikomx iltiema. Nerġa’ niġi għandkom. Ftit ieħor, u d-dinja ma taranix aktar. Iżda intom għad tarawni, għax jiena ngħix, u intom ukoll għad tgħixu. F’dak il-jum intom tagħrfu li jiena f’Missieri, u intom fija u jiena fikom. Min iżomm il-kmandamenti tiegħi u jħarishom, dak hu li jħobbni; u min iħobb lili, iħobbu wkoll il-Missier, u jiena wkoll inħobbu u nurih lili nnifsi”.

Il-Kelma tal-Mulej

Ġesu jkompli d-diskors tiegħu fiċ-ċenaklu, u naqraw biċċa oħra mit-Testment tiegħu.  Huma kliem ta’ mħabba tal-Għarus lill-għarusa tiegħu (il-Komunita’).  Il-kelma “tħobb” insibuha 26 darba f’dan it-Testment imqassam f’ħames kapitli. 

“Jekk tħobbuni…..”  Ġesu jitlob l-imħabba tagħna lejh seba’ darbiet f’dawn il-kapitli.  “Tħobbuni” żgur mhux xi sentimentaliżmu, imma “min irid jgħaqqad ħajtu ħaġa waħda ma’ Tiegħi” – l-istess kif għarus jitlob lill-għarusa tgħaqqad ħajjitha ma’ ħajtu fi proġett ta’ mħabba “sa mal-mewt tifridna”. 

“Tħarsu l-Kmandamenti Tiegħi,” mhux biss l-għaxra tas-soltu imma li ngħixu kemm jista’ jkun kif għex Hu – għotja għall-oħrajn.  

Il-ħajja ta’ żagħżugħ tinbidel ta’ taħt fuq hekk kif jiġġennen wara tfajla: jibda jagħmel kollox biex jogħġobha, jilbes aħjar, jistudja, jistinka u jaħdem aktar.  Għax imħabba sinċiera bħal din tiġġenera ħafna enerġija.  

Meta wieħed isir iħobb tassew lil Ġesu jagħmel l-istess. Ftit vrus qabel ma qal “tħarsu l-Kmandamenti” kien għadu kif qalilhom: “Nagħtikom bħala rigal kmandament ġdid (ġdid fis-sens li se jieħu post l-oħrajn kollha ta’ qablu): li tħobbu lil xulxin bħalma ħabbejtkom jien. Minn dan jgħarfukom li intom dixxipli Tiegħi.”  Dan hu kmand wieħed li mhux se jiġi imponut minn barra bħal dawk tal-liġi l-qadima. 

Dil-ħajja tal-Imħabba mogħtija lilna bħala rigal mill-Missier Etern, hi l-istess Imħabba li sostniet lil Ġesu tul ħajtu u hija l-istess spirtu mogħti lilna biex isir kmandament fina, u nobduh mhux għax bil-fors, imma sforz l-identita tagħna ta’ wlied Alla.  Bħal Ġesu li obda sal-mewt mhux imħabba xi kmandament li ġie mpost fuqu minn barra, imma għax kien dan l-ispirtu fih li qanqlu biex jagħti ħajtu minn rajh, għax din hi l-Ħajja Divina: ir-rigal tal-Imħabba.  

Fil-fatt il-messaġġ kollu ta’ Ġesu jista’ jinġabar f’din il-kelma waħda: “Ħobbu!”  Dan ma jitwettaqx b’azzjoni waħda imma b’diversi, i.e. kull mument ta’ ħajti jien irrid nagħżel il-mod kif se nħobb l-aktar.  Fl-innu għall-imħabba ta’ San Pawl insibu li l-imħabba taf tadatta ruħha għal kull sitwazzjoni.  Min iħobb bħal Ġesu jaf x’iferraħ il-proxxmu u x’jgħinu biex jitbissem u jħossu tajjeb. 

“Tħarsu l-Kmandamenti…” tħarsu, i.e. iżżommuhom f’qalbkom,  ikunu l-ħin kollu għad-dispożizzjoni  tagħkom biex, malli jinqala’ l-bżonn, tirreferu għalihom.  F’kelma waħda nagħmluhom parti minna, mill-istess ħajja tagħna.

Il-konsegwenza ta’ min jagħmel hekk hi li jkun disponibbli biex jirċievi l-Ispirtu s-Santu:  “u Hu jagħtikom Difensur”, dak li se jkun viċin tagħkom biex jiddefendikom mill-inklinazzjonijiet u xewqat ħżiena.  Dment li Ġesu kien fid-dinja, Hu kien id-Difensur tal-Appostli.  Imma issa li sejjer, qed iwiegħed Difensur,  Konsolatur li se jibqa’ magħna għal dejjem.  Dan hu l-Ispirtu tal-verita, dak li se jgħinna nimxu mhux fil-gideb imma fis-sewwa, ngħixu ħajja vera, awtentika.  L-anqas iħallina nidħku bina nfusna. 

Nieħdu tnejn min-nies li jkollhom xi jgħidu fuq xi ħaġa.  Jgħollu leħinhom, iħarsu b’qilla, u forsi jaslu biex jaħbtu għal xulxin.   Din mhix imġieba umana imma bestjali. Il-bniedem veru jiddi minnu dak li jikkaratterizzah: imbuttat mill-Ispirtu li jgħix fih, jagħmel kollox bl-imħabba.  Fil-fatt, kull azzjoni li mhix ġejja mill-imħabba hija gidba.

….”li d-dinja ma tistax tilqgħu..” Mhux qed jgħid għall-oħrajn imma għal dik il-parti fija li tkompli tixxennaq għall-poter, regħba, eċċ u li tipprova tfixkel ir-rapport tiegħi ta’ servizz għall-oħrajn.  Din is-sħaba sewda tinsab f’kull wieħed minna u tkun trid toħnoq il-miġja tas-Saltna l-ġdida, i.e. is-saltna tal-ħrief mhux tal-ilpup.

“…iżda intom tagħarfuh, għax jiġi jgħammar fikom.” L-Appostli għadhom kif raw lil Ġesu jaħslilhom riġlejhom, joffri l-id tal-ħbiberija lil Ġuda, iqawwi qalb Pietru.  Dan l-Ispirtu jafuh għax rawh jaħdem fi Kristu.  Il-Qawwa ta’ dan l-istess Spirtu se tgħaddi għal għand l-Appostli, Qawwa li tgħinhom u tgħallimhom kif għandhom iħobbu.

“Ma nħallikomx iltiema”. Iltim u armel hu dak li sofra firda ta’ xi ħadd għażiż. Ġesu jserraħ moħħ l-Appostli (u aktar tard lill-Komunita’ Nisranija) li fuq il-Kalvarju se jmut il-ġisem li kien limitat bħal ta’ kull bniedem ieħor.  Imma issa se jerġa’ jiġi u jkun preżenti f’ħajjithom b’ġisem ġdid, glorjuż u bla limiti.  Se jkun preżenti l-ħin kollu magħna għax ma jkollux bżonn mistrieħ jew irqad.

“Ftit ieħor u d-dinja ma taranix aktar, ma tarax il-ġisem antik tiegħi.  Imma intom għad tarawni bil-ġisem il-ġdid, għax jien ngħix.  U din il-ħajja se ngħaddiha lilkom.”  Din se tkun il-mixja ta’ kull Nisrani li kuljum jiskopri dejjem aktar xi tfisser il-ħajja ta’ Kristu (l-Għarus) mogħtija lill-Komunita’ (l-Għarusa) bħala don. 

“Dak in-nhar intom tagħarfu li jien f’Missieri u intom fija u jiena fikom.”  Dan hu l-għan ta’ kull Quddiesa: l-għaqda tal-membri tal-Komunita bejniethom, u l-għaqda tal-Komunita fit-Trinita’.   Wara kollox il-Quddiesa hija ikla ta’ tieġ “ - ‘Hienja dawk li kienu mistiedna għall-mejda  TAT-TIEĠ tal-Ħaruf’.  Qalli: ‘Dan hu kliem tassew ta’ Alla’”(Apok: 29, 7-9). Kristu li hu wieħed jiġi fina li aħna ħafna.  U aħna li aħna ħafna nsiru ħaġa waħda permezz ta’ Kristu (Communion = union of the Community).

“Min għandu l-Kmandamenti tiegħi …dan hu li jħobbni.”  Dan id-diskors ta’ Ġesu, għalkemm imsejjaħ minn xi wħud bħala Testment,  mhux xi tmiem imma bidu.

Author: Joe Farrugia Segretarjat għal-Lajċi