Dan huwa dak li għandha x'toffri s-soċjetà ta' għada lil dawk li huma l-aktar vulnerabbli ?

 

Dan huwa dak li għandha x'toffri s-soċjetà ta' għada lil dawk li huma l-aktar vulnerabbli: minflok l-imħabba u l-kumpassjoni, att ta' disperazzjoni u l-eżilju fis-solitudni għal deċiżjoni fatali.

Dan huwa l-frott ta' viżjoni mijopika tal-bniedem li tinvesti, b'mod esklussiv, it-tama kollha tal-bniedem fil-progress xjentifiku u teknoloġiku. 'L hinn minnhom ma jifdal ebda realtà relevanti li toffri tama ġenwina lill-bniedem. B'konsegwenza ta' dan, meta nmissu l-limiti tal-mediċina u t-teknoloġija, inmissu wkoll il-limiti tat-tama. Mal-konfini tax-xjenza l-bniedem ma jifdallu xejn iżjed għajr ir-rassenjazzjoni u d-disperazzjoni.

Iżda d-dinjità tal-bniedem hija ogħla għax fil-qalba tagħha għandha l-abbiltà li toffri u tilqa' kumpassjoni, jiġifieri toffri akkumpanjament u qsim fit-tbatija, frott l-imħabba u għotja ġeneruża li l-bniedem biss jista' joffri.

F'dan is-sens, bil-kontra tal-ewtanażija, soċjetà ta' kumpassjoni taħdem biex fl-aktar mumenti vulnerabbli, persuna ma ġġarrabx it-tbatija weħidha fis-solitudni iżda tiġi dejjem akkumpanjata minn soċjetà li tgħożżha, tħoss u ġġarrab magħha, tbati magħha u tqim id-dinjità tagħha sal-aħħar.

Soċjetà li tagħti verament kumpassjoni u dinjità timxi ma' dak li jbati bħala wieħed minnha minflok ma teżiljah fid-deżert biex jieħu deċiżjoni terminali.