Ġesù qabad il-ħobż u newwilhulhom; u hekk ukoll għamel bil-ħut. Studju Bibbliku Ġw 21:1-19 - Qari tat-Tielet Ħadd tal-Għid

 

F’dak iż-żmien, Ġesù raġa’ deher lid-dixxipli ħdejn il-baħar ta’ Tiberija. Dehrilhom hekk: Xmun Pietru, Tumas, li jgħidulu t-Tewmi, Natanjel minn Kana tal-Galilija, ulied Żebedew u tnejn oħra mid-dixxipli tiegħu kienu flimkien. Xmun Pietru qalilhom: “Sejjer nistad”. Qalulu: “Ħa niġu miegħek aħna wkoll”. Marru, rikbu d-dgħajsa, u dak il-lejl ma qabdu xejn.

Filgħodu mas-sebħ, Ġesù kien qiegħed ix-xatt, imma d-dixxipli ma kinux jafu li kien Ġesù. Ġesù qalilhom: “Għandkom x’tieklu, ħbieb?”. “Le”, weġbuh. Qalilhom: “Waddbu x-xibka n-naħa tal-lemin tad-dgħajsa u ssibu”. Dawn waddbu x-xibka, u mbagħad ma felħux jiġbduha daqskemm qabdu ħut! Id-dixxiplu li kien iħobb Ġesù qal lil Pietru: “Il-Mulej dan!”. Għalhekk Xmun Pietru, kif sama’ li kien il-Mulej, xeħet fuqu l-libsa ta’ fuq, għax kien għoddu għeri, u ntafa’ l-baħar. Id-dixxipli l-oħra, billi ma kinux imbiegħda wisq mill-art, imma xi mitejn driegħ biss, resqu bid-dgħajsa jkaxkru warajhom ix-xibka bil-ħut.

Kif niżlu l-art, raw li kien hemm xi faħam jaqbad, bil-ħut fuqu, u xi ftit ħobż. Qalilhom Ġesù: “Newlu ’l hawn xi ħutiet minn dawk li għadkom kemm qbadtu”. Xmun Pietru tala’ fid-dgħajsa u ġibed l-art ix-xibka mimlija b’mija u tlieta u ħamsin ħuta kbira; u minkejja daqshekk ħut, ix-xibka ma nqasmitx. Qalilhom Ġesù: “Ejjew, kulu”. Imma ħadd mid-dixxipli ma ssogra jistaqsih: “Int min int?”, għax kienu jafu li kien il-Mulej. Ġesù resaq, qabad il-ħobż u newwilhulhom; u hekk ukoll għamel bil-ħut. Din kienet ġa t-tielet darba li Ġesù deher lid-dixxipli wara l-qawmien tiegħu mill-imwiet.

Il-Kelma tal-Mulej.

Il-ġrajja tal-lum seħħet f’Tabga (minn Eptapegon=7 għejjun tal-ilma), fejn il-baħar ta’ Tiberija.  Importanti li ma niqfux biss fuq il-fatti storiċi imma li nieħdu t-tagħlim li dawn ituna.

(i) Għaliex id-dixxipli qishom raw l-Irxoxt l-ewwel darba?  

(b) Għax skantaw bil-qabda tal-ħut?  

(ċ) Għaliex Pietru u sħabu reġgħu lura ‘l Galilija jistadu wara li raw lil Ġesu’ rxoxt, qishom insew it-tliet snin li għaddew?  

It-tweġibiet jiħtieġ infittxuhom fil-fond u fid-dawl tal-lingwaġġ Bibliku.

“Ġesu’ reġa’ wera ruħu lid-dixxipli.”  Ġa rawh nhar il-Qawmien u ġimgħa wara meta kien hemm Tumas.  Dan ta bidu biex l-Insara jiltaqgħu ma’ Kristu Rxoxt kull nhar ta’ Ħadd u biex jaqsmu l-Ħobż bejniethom.  

Illum naraw li Ġesu’ ma deherx il-Ħadd u l-anqas f’kamra (simbolu ta’ Knisja) imma fuq il-baħar, waqt ix-xogħol tagħhom ta’ sajjieda.  Il-messaġġ hu li Kristu Rxoxt irid jiltaqa’ magħna fost il-ġimgħa wkoll – id-dar u fuq ix-xogħol. 

Ġwanni jsejjaħ l-Għadira ta’ Tiberija baħar għax dan, fil-moħħ semitiku, iqanqal immaġini ta’ xogħol iebes, diffikultajiet u riskju ta’ xi għarqa.  Dan hu xebħ ta’ kemm id-dixxipli se jkollhom jaqdfu kontra l-kurrent biex iwasslu l-messaġġ ta’ Kristu.  

Tiġbed il-ħut mill-ħalel tal-baħar għal fuq id-dgħajsa  jfisser issalva n-nies mill-vizzji li jkunu qed jgħarrquhom, u ddaħalhom lura fil-Komunita’. 

Din l-Għadira qabel kien jisimha “tal-Galilija” imma Erodi semmiha għal Tiberju biex jilgħaq lir-Rumani.  Ġwanni jagħżel dan l-isem biex juri kemm kienet kbira l-influwenza pagana f’dawk l-inħawi.  Anki llum ngħixu f’baħar ta’ paganiżmu. Għalhekk aħna d-dixxipli tal-lum imsejħin biex ma naqtgħux qalbna u nkomplu nevanġelizzaw il-Ħadd u fost il-ġimgħa, fil-Knisja, d-dar u fuq il-post tax-xogħol, spalla ma’ spalla ma’ Kristu Rxoxt.

Ġesu’ “dehrilhom hekk.”  Mhux huma lemħuh imma Hu deher lilhom.  Id-dixxipli kienu l-ewwel membri tal-Knisja Nisranija.  Pietru kien dak li sabha iebsa biex jaċċetta l-ideja tal-bniedem li jirnexxi skont il-kriterji ta’ Ġesu’, i.e. li jagħti ħajtu bħala rigal għall-oħrajn.  

Tumas (tewmi ma’ kull min jagħmel bħalu) sabha iebsa jgħix f’komunita’ u biex jemmen, għax ried provi xjentifiċi.  

Natanjel “taħt it-tina” jfisser li kien jistenna dik il-paċi mħabbra mill-profeti.  Hekk, b’qalbu safja, kif iltaqa’ ma’ Kristu, emmen.  

Ġwanni u Ġakbu kienu l-fanatiċi li jaħsbu li huma biss jistgħu jagħmlu l-ġid.  Moħħhom biex jitolbu n-nar jaqa’ fuq il-midinbin.  

Dawn kollha huma karattri li nsibu bħalhom fil-Knisja llum.  Fuq id-dgħajsa kien hemm tnejn oħra li m’għandniex isimhom.  Dawk l-Insara li ma jixbhux l-ewwel ħamsa aktarx jixbhu lill-aħħar tnejn.  F’did-Dgħajsa hemm post għal kulħadd, għal kull min jixtieq jipprova jwettaq id-dinja l-ġdida kif fassalha Kristu.  

“Sejjer nistad.”  Pietru ma jordnax, imma l-eżempju tiegħu ikaxkar l-oħrajn miegħu: “Itimgħu l-merħliet fdati f’idejkom u ndukrawhom, mhux fuq qalbkom imma b’ġenerożita’, mhux tikkmandawhom imma tkunu ta’ mudell għalihom” (1 Pietru). 

Issa r-rakkont  jieħu forma ta’ parabbola:  L-ewwel stadu bil-lejl.  Mingħajr id-dawl, “is-sajda” ma tatx frott.  Il-ħidma bil-lejl issir min-nies li jsegwu l-kriterji tal-bnedmin.  Il-jum Lhudi kien jibda lejliet ma’ nżul ix-xemx.  Mela l-ewwel għandek lejl diżuman ta’ paganiżmu.  Mas-sebħ jitfaċċa d-dawl: “Min jemmen tassew, jaf kif għandu jilqa’ dan id-dawl ta’ ‘jum ġdid’” (S. Pawl).  

“Ġesu’ kien ix-xatt, wieqaf,” għax irxoxta u għax temm il-vjaġġ Tiegħu.  Imma ma jabbandunax lil min għadu jbaħħar u jitħabat għall-għixien. M’għarfuhx għax, għalkemm Hu baqa’ l-istess persuna, issa kien f’kundizzjoni differenti minn qabel.  

“Għandkom x’tieklu, ħbieb?” li jikkumplimenta dak li għandi diġa’?  Ġesu’ jsejħilhom ‘ħbieb’ biex juri l-imħabba u l-attenzjoni li kellu għal dawn il-“ħbieb tal-Għarus.”  Id-dixxiplu hu dejjem imsejjaħ biex jipprovdi “l-kontorni” għall-Ħobż Imqaddes. 

“Ma qbadna xejn.” Kemm-il darba jiġrilna li, minkejja l-impenn fil-ħidma pastorali, ma narawx frott.  U kemm sforzi biex neqirdu l-gwerer, il-ġuħ, eċċ?  Jekk dawn isiru bi kriterji umani u egoistiċi biss, ma jistgħux jirnexxu.  

Jiħtieġ nisimgħu il-Kelma li l-Mulej ħallielna: “Waddbu x-xibka n-naħa tal-lemin.”  Il-lemin hi n-naħa t-tajba tal-bniedem.  Din tgħin lid-dixxiplu joħroġ lil ħuh mill-vizzji bil-ħlewwa, bil-kelma t-tajba u bl-imħabba. Hekk jurih it-tajjeb li hemm fih. Bil-kundanni, bl-għajjat u bl-insulti ma jasal imkien.

“Il-Mulej dan.”  Dan id-dixxiplu bla isem hu kull min li, fost l-ilħna li jisma’ kuljum (min jgħajjat l-iktar) jaf jagħraf dak tal-Mulej. Imbagħad jindika lill-oħrajn kif jagħrfuh.  

“Pietru xeħet fuqu l-libsa.”  Il-verb “libes” użat hawn hu l-istess bħal meta Ġesu’ libes il-fardal.  Pietru mela qed jgħid: “ Mhux se nirrifjuta l-fardal kif għamilt fl-Aħħar Ċena, imma issa lest biex naqdi.”  “Intefa’ l-baħar” biex jindika li jrid jibda bil-Magħmudija.  Min jogħdos fl-ilma jgħarraq l-egoiżmu u l-vizzju tiegħu, u joħroġ mill-ilma liebes l-imħabba altruista u l-virtuijiet kollha: “Ilbsu lil Kristu” (Rum).  Kull min jiltaqa’ ma dan id-dixxiplu eżemplari  se jagħraf lil Kristu.

“Id-dixxipli l-oħra resqu bid-dgħajsa”.  Għalkemm żgħira din għandha missjoni kbira, għax din hi l-Knisja li n-nies li qegħdin  f’sitwazzjoni ta’ mewt ittellagħhom għal ħajja.  Waslu l-art u sabu faħam, ħut (iktus – Ġesu Kristu Iben Alla Salvatur), u ħobż (Kristu magħmul ikel għall-bnedmin).  

“Ġibuli l-ħut”.  Pietru jġiblu ħut mid-dgħajsa. Dan ifisser li s-suċċess tal-missjoni tad-dixxipli  jseħħ meta jsalvaw l-umanita’ kollha (153=numru li juri totalita’) mit-telfien u jeħduha għand Kristu. 

Is-silta tispiċċa f’kuntest Ewkaristiku: “Qabad il-ħobż u newwilulhom”, għax is-suċċes li semmejna ma jistax iseħħ mingħajr l-Ewkaristija.